საქართველოს მტერი წარსულშიც ყოველთვის ცდილობდა და ახლაც ცდილობს ჩვენს სამშობლოს კუთვნილი ტერიტორიები წაართვას და მიითვისოს.
საუკუნეების მანძილზე ქართველი მეფე-დედოფლები, ქართველი მამულიშვილები უფლის რწმენით, ქრისტიანული მართლმადიდებლური რელიგიის ერთგულებით, სამშობლოს სიყვარულით, ერთსულოვნებით, კარგი განათლებით ახერხებდნენ დაკარგული ტერიტორიების დაბრუნებას.
ალბათ, გაგებული გექნებათ, ჩვენო პატარა მეგობრებო, რომ ავბედითობით საქართველოს ეკლესიის ბევრი ეკლესია-მონასტერია თურქეთისა და აზერბაიჯანის ტერიტორიაზე... აგრეთვე, ბევრი ქართული ხუროთმოძღვრული ძეგლია სომხეთის ტერიტორიაზეც...
ალბათ, ისიც გექნებათ გაგებული, რომ დღეს აფხაზეთისა და სამაჩაბლოს ტერიტორია რუსეთის მიერ არის ოკუპირებული. სულ რამოდენიმე წლის წინ, 2008 წლის ზაფხულში შიდა ქართლის დიდი ნაწილიც რუსეთის მიერ იქნა დაპყრობილი.
ახლა კი დამპყრობელი ყველანაირად ცდილობს ყველა ქართულ ტაძარს, ციხე-სიმაგრეს, მდინარეს, ხიდს - ყველაფერს შეუცვალოს სახელები, წაშალოს ქართული კვალი. ამას კი იმიტომ აკეთებს, რომ ქართველმა ერმა დაივიწყოს საკუთარი სამშობლოს ნაწილი, დაპყრობილმა ტერიტორიამ კი - საკუთარი სამშობლო და ასე ცდილობს საქართველოს დაპატარავებას.
სამწუხაროდ, ინტერნეტსივრცეშიც ვრცელდება პატარა კლიპები, ფილმები შიდა ქართლის დაპყრობილი ტერიტორიებიდან, სადაც ქართულ ხუროთმოძღვრულ ძეგლებს უკვე შეცვლილი აქვთ სახელები.
ბავშვებო, ალბათ ყველას გაქვთ წაკითხული იაკობ გოგებაშვილის "იავნანამ რა ჰქმნა?"
პატარა ქეთო ლეკებმა მოიტაცეს... შემდეგ გატაცებული პატარა ქართველი გოგონა თავიანთი ადათ-წესების მიხედვით გაზარდეს, საქართველო და ქართველობა სრულებით დაავიწყეს... და როდესაც წლების შემდეგ ქეთო სამშობლოში თავის მშობლებთან მოხვდა, მან ვერ იცნო ისინი... სამაგიეროდ მშობლები ცნობდნენ წლების წინ დაკარგულ ქალიშვილს და თავიანთი უზარმაზარი რწმენით, სიყვარულით, სითბოთი ქეთოსაც გაახსენეს სამშობლო, ოჯახი... და დაიბრუნეს წლების წინ დაკარგული შვილი...
ჩვენც ისევე უნდა ვიცნობდეთ საქართველოს, საქართველოს ისტორიას, როგორც დედა იცნობს საკუთარ შვილს და მაშინ ჩვენი რწმენით, ლოცვით, სიყვარულით, ერთგულებით და ერთსულოვნებით აუცილებლად შევძლებთ საქართველოს გაერთიანებას...
კონკურსში "ერთად გავიცნოთ საქართველო..." მონაწილეობის მიღება შეუძლია
V-XII კლასის ნებისმიერ მოსწავლეს. მოსწავლემ უნდა დაწეროს ერთ-ერთი თემა საკონკურსო თემებიდან.
კონკურსში მოცემულია 4 თემა:
1. აფხაზეთი და აფხაზეთის ხუროთმოძღვრული ძეგლები (მოქვის ტაძარი, ბიჭვინთის ტაძარი, ლიხნის ტაძარი, ბედიის მონასტერი);
2. შიდა ქართლი და შიდა ქართლის ხუროთმოძღვრული ძეგლები (იკორთის ტაძარი, ნიქოზის სამონასტრო კომპლექსი, ცხინვალის საკათედრო ტაძარი, ერედვის ტაძარი);
3. ტაო-კლარჯეთი და ტაო-კლარჯეთის ხუროთმოძღვრული ძეგლები (ხახულის მონასტერი, ხანძთის მონასტერი);
4. ისტორიული ჰერეთი და ისტორიული ჰერეთის ხუროთმოძღვრული ძეგლები (ქურმუხის ტაძარი, ალიბეგლოს ტაძარი).
მოსწავლე ირჩევს ჩამოთვლილი 4 თემიდან ერთ-ერთს. შემდეგ მოსწავლემ უნდა მოიძიოს არჩეული თემის მიხედვით საქართველოს აღნიშნული კუთხის შესახებ ზოგადი ინფორმაცია, მოკლე ინფორმაცია ამ კუთხეში არსებული ხუროთმოძღვრული ძეგლების შესახებ და უნდა აირჩიოს შესაბამისი თემის ფრჩხილებში მითითებული ტაძრებიდან ერთ-ერთი, რომლის შესახებაც დაწვრილებით მოიძიებს ინფორმაციას.
მ ა გ ა ლ ი თ ა დ, თუ მოსწავლე ირჩევს, მე-2 თემას: "შიდა ქართლი და შიდა ქართლის ხუროთმოძღვრული ძეგლები". მოსწავლემ უნდა მოიძიოს ზოგადი ინფორმაცია შიდა ქართლის შესახებ, ინფორმაცია შიდა ქართლის ხუროთმოძღვრული ძეგლების შესახებ და თუ, მაგალითად, ფრჩხილებში მითითებული ტაძრებიდან აირჩევს იკორთის ტაძარს, ამ ტაძრის შესახებ უნდა მოიძიოს დაწვრილებით ინფორმაცია.
საკონკურსო თემების შესახებ ინფორმაციის მოძიება შეგიძლიათ წიგნების და ინტერნეტში არსებული ინფორმაციების საშუალებით. ასევე თემების დაწერისას ძალიან დაგეხმარებათ, "საბავშვო ბლოგზე" ატვირთული გადაცემები, სადაც ბევრ მნიშვნელოვან და საინტერესო საკითხებს გაიგებთ თქვენს მიერ არჩეული თემის ირგვლივ.
აქვე მოგაწვდით, "საბავშვო ბლოგზე" ატვირთული გადაცემების ლინკებს:
1. აფხაზეთი - http://afxazeti-dzeglebi.blogspot.com/
2. შიდა ქართლი - http://shidaqartlisdzeglebi.blogspot.com/
3. ტაო-კლარჯეთი - http://tao-klarjeti-dzeglebi.blogspot.com/
4. ისტორიული ჰერეთი - http://istoriulihereti.blogspot.com/
მოსწავლეებს თემების გამოგზავნა შეუძლიათ, ელ-ფოსტაზე: miqarcmindeli@gmail.com
თემა დაახლოებით უნდა იყოს 2-3 ფურცლიანი მაინც. თემის გამოგზავნისას მოსწავლემ უნდა მიუთითოს სახელი, გვარი, სკოლა, კლასი და საკონტაქტო ტელეფონის ნომერი.
თემების გამოგზავნის ბოლო ვადაა 10 მაისი.
დამატებითი ინფორმაციის მისაღებად შეგიძლიათ დაგვიკავშირდეთ
ელ-ფოსტის miqarcmindeli@gmail.com ან "საბავშვო ბლოგის" ფეისბუქ-გვერდის საშუალებით.
წარმატებებს გისურვებთ!
